ആരായാരിക്കും കേരള ബ്ലാസ്റ്റേഴ്സിന്റെ പുതിയ മുഖ്യ പരിശീലകൻ എന്നത് അറിയാനുള്ള കാത്തിരിപ്പിലാണ് മഞ്ഞപ്പട ആരാധകർ. ടീമിന്റെ മോശം ഫോമിനെ തുടർന്ന് പുറത്താക്കിയ മൈക്കിൾ സ്റ്റാഹ്രെയുടെ ഒഴിവിലേക്ക്, കേരള ബ്ലാസ്റ്റേഴ്സിനെ നിലവിലെ ദയനീയ അവസ്ഥയിൽ നിന്ന് രക്ഷിച്ചെടുക്കാൻ ഒരുപിടി മുൻ ഐഎസ്എൽ പരിശീലകരുടെ പേരുകൾ ഇതിനോടകം ചർച്ച ചെയ്യപ്പെട്ടു.
കേരള ബ്ലാസ്റ്റേഴ്സിന്റെ തന്നെ മുൻ പരിശീലകൻ ആയിരുന്ന ഇവാൻ വുക്കമനോവിക് തിരികെ വരാൻ ആരാധകർ ആഗ്രഹിച്ചിരുന്നുവെങ്കിലും, ഇക്കാര്യം അദ്ദേഹം തന്നെ നിഷേധിച്ചതോടെ അത് അവസാനിച്ചു. നേരത്തെ, മോഹൻ ബഗാൻ, മുംബൈ ടീമുകൾക്കൊപ്പം ഐഎസ്എൽ കിരീടം ചൂടിയ ഐഎസ്എല്ലിലെ തന്നെ ഏറ്റവും പ്രമുഖരായ പരിശീലകർ അന്റോണിയോ ലോപ്പസ് അബ്ബാസ്, ഡെസ് ബക്കിംഗ്ഹാം എന്നിവരോട് കേരള ബ്ലാസ്റ്റേഴ്സ് ചർച്ച നടത്തിയിരുന്നതായി റിപ്പോർട്ടുകൾ ഉണ്ടായിരുന്നു.
ഇപ്പോൾ മറ്റൊരു ശ്രദ്ധേയ നീക്കം കേരള ബ്ലാസ്റ്റേഴ്സ് നടത്തുന്നതായി റിപ്പോർട്ടുകൾ പുറത്തുവരുന്നു. ഇന്ത്യൻ സൂപ്പർ ലീഗിലെ ഏറ്റവും മികച്ച പരിശീലകരിൽ ഒരാളായ സെർജിയോ ലൊബേരയെ ഭാഗമാക്കാൻ ശ്രമിക്കുകയാണ് കേരള ബ്ലാസ്റ്റേഴ്സ്. നിലവിൽ ഒഡിഷ എഫ്സിയുടെ പരിശീലകനായ സെർജിയോ ലൊബേരയെ അടുത്ത സീസണ് മുന്നോടിയായി ടീമിൽ എത്തിക്കാൻ കേരള ബ്ലാസ്റ്റേഴ്സ് ആഗ്രഹിക്കുന്നു. അതേസമയം, ഇത് കേരള ബ്ലാസ്റ്റേഴ്സിനെ സംബന്ധിച്ചിടത്തോളം വലിയ വെല്ലുവിളി ആണ്.
🚨 Kerala Blasters are keen on luring in Sergio Lobera next summer. But, the deal is very complicated to succeed as there is more hindrance than to make the cut!#KBFC #ISL #Transfers pic.twitter.com/zMZhiFlZ11
— Rejin T Jays (@rejintjays36) December 26, 2024
2023-ൽ ഒഡിഷയുടെ പരിശീലകനായ സെർജിയോ ലൊബേരയുടെ കരാർ, 2025 വരെയാണ് നിലനിൽക്കുന്നത്. ഈ കരാർ അവസാനിക്കുന്ന പക്ഷം, അടുത്ത സമ്മറിൽ സ്പാനിഷ് പരിശീലകനെ ഒപ്പം ചേർക്കാനാണ് കേരള ബ്ലാസ്റ്റേഴ്സ് പദ്ധതി. എന്നാൽ, നിലവിലെ സീസൺ പൂർത്തിയാക്കാൻ ഒരു മുഖ്യ പരിശീലകൻ ബ്ലാസ്റ്റേഴ്സിന് നിർബന്ധമാണ് എന്ന സ്ഥിതിക്ക്, സെർജിയോ ലൊബേരയെ കൊണ്ടുവരാനുള്ള പദ്ധതി എത്രത്തോളം പ്രായോഗികമാകും എന്ന കാര്യത്തിൽ തീർച്ചയില്ല.
47-കാരനായ സെർജിയോ ലൊബേര, തന്റെ ഇരുപതാമത്തെ വയസ്സ് മുതൽ പരിശീലകന്റെ റോൾ അണിയുന്നതാണ്. ബാഴ്സലോണ യൂത്ത് ടീമിന്റെ പരിശീലകനായി കരിയർ ആരംഭിച്ച സെർജിയോ ലൊബേര, 2012-ൽ ബാഴ്സലോണയുടെ സഹപരിശീലകനായും ചുമതലവഹിച്ചു. ഇന്ത്യൻ സൂപ്പർ ലീഗിൽ, നേരത്തെ ഗോവ, മുംബൈ സിറ്റി എന്നീ ടീമുകളുടെ പരിശീലകനായും സെർജിയോ ലൊബേര പ്രവർത്തിച്ചിട്ടുണ്ട്. ഗോവക്കൊപ്പം ഇന്ത്യൻ സൂപ്പർ ലീഗ് ഷീൽഡ്, സൂപ്പർ കപ്പ് എന്നിവ നേടിയ സെർജിയോ ലൊബേര, മുംബൈക്കൊപ്പം ഇന്ത്യൻ സൂപ്പർ ലീഗ് ഷീൽഡും, 2020-21 ഐഎസ്എൽ സീസൺ ജേതാക്കൾ ആവുകയും ചെയ്തു.
