ഈ സീസണിൽ കേരള ബ്ലാസ്റ്റേഴ്സ് ജേഴ്സിയിൽ ഏറ്റവും മികച്ച പ്രകടനം നടത്തിയ താരമാണ് മൊറോക്കൻ ഫോർവേഡ് നോഹ സദൗയി .കഴിഞ്ഞ വർഷം എഫ്‌സി ഗോവയ്‌ക്കൊപ്പം ഗോൾഡൻ ബൂട്ട് നേടിയ നോഹ സദൗയി ഈ സീസണിൽ കേരള ബ്ലാസ്റ്റേഴ്സിനൊപ്പം അത് ആവർത്തിക്കാനുള്ള ഒരുക്കത്തിലാണ്.
കേരള ബ്ലാസ്റ്റേഴ്‌സിൻ്റെ ഈ സീസണിലെ ഇതുവരെയുള്ള ഏറ്റവും മികച്ച കളിക്കാരനായി നോഹയെ നമുക്ക് തെരഞ്ഞെടുക്കാം.ബെംഗളൂരു എഫ്‌സിക്കെതിരായ മത്സരം പരിക്ക് മൂലം നോഹക്ക് നഷ്ടമായിരുന്നു. കൊച്ചിയിൽ നടന്ന ആവേശകരമായ മത്സരത്തിൽ ഒന്നിനെതിരെ മൂന്നു ഗോളുകൾക്ക് ബ്ലാസ്റ്റേഴ്സ് പരാജയപ്പെട്ടിരുന്നു. മത്സരത്തിൽ നോഹയുടെ അഭാവം പ്രകടമായിരുന്നു, ഗോൾ അവസരങ്ങൾ ഒരുക്കാനും ഗോൾ അടിക്കാനും മിടുക്ക് തെളിയിച്ച താരമാണ് നോഹ.”ലീഗിലെ ഏറ്റവും മികച്ച കളിക്കാരിൽ ഒരാൾ ഇല്ലാതെ കളിക്കുന്നത് വലിയ ബുദ്ധിമുട്ടാണ് ,അദ്ദേഹത്തെ ഞങ്ങൾ കളിക്കളത്തിൽ ഒരുപാട് മിസ് ചെയ്തു” ബ്ലാസ്റ്റേഴ്സ് പരിശീലകൻ മത്സര ശേഷം പറഞ്ഞു.
അദ്ദേഹത്തെ കളിക്കളത്തിലേക്ക് തിരികെയെത്താൻ ആരാധകർ ആകാംക്ഷയോടെ കാത്തിരിക്കുമ്പോൾ, മുംബൈയ്‌ക്കെതിരായ മത്സരത്തിന് മുന്നോടിയായുള്ള നിർണായക ഫിറ്റ്‌നസ് ടെസ്റ്റിൽ വിജയിച്ചാകും നോഹയുടെ തിരിച്ചുവരവ്. ബ്ലാസ്റ്റേഴ്സ് മാനേജ്‌മെൻ്റും കോച്ചിംഗ് സ്റ്റാഫും അദ്ദേഹത്തിൻ്റെ പുരോഗതിയെ സൂക്ഷ്മമായ ശുഭാപ്തിവിശ്വാസത്തോടെ നിരീക്ഷിക്കുന്നു. അദ്ദേഹം ഫിറ്റ്‌നസ് വിലയിരുത്തൽ ക്ലിയർ ചെയ്താൽ,അടുത്ത മത്സരത്തിൽ ബ്ലാസ്റ്റേഴ്സ് ലൈനപ്പിൽ നോഹയുണ്ടാവും. മൊഹമ്മദൻസിനെതിരെയുള്ള അവസാനം കളിച്ച മത്സരത്തിൽ നോഹയായിരുന്നു മാൻ ഓഫ് ദി മാച്ച്.
കേരള ബ്ലാസ്റ്റേഴ്സിന്റെ മുൻ മത്സരത്തിലും നോഹ തന്നെയായിരുന്നു പ്ലെയർ ഓഫ് ദി മാച്ച്. കേരള ബ്ലാസ്റ്റേഴ്സിനായി 9 മത്സരങ്ങളിൽ നിന്ന് 6 പ്ലെയർ ഓഫ് ദ മാച്ച് അവാർഡ് നോഹ സദൗയി നേടിയിട്ടുണ്ട്. ലീഗിലെ നാലാമത്തെ പ്ലെയർ ഓഫ് ദി മാച്ച് പുരസ്കാരം ആയിരുന്നു കൊൽക്കത്തയിൽ നേടിയത്.നേരത്തെ കേരള ബ്ലാസ്റ്റേഴ്സ് ഈസ്റ്റ് ബംഗാളിനെ പരാജയപ്പെടുത്തിയപ്പോഴും നോർത്ത് ഈസ്റ്റിനെതിരെയും ഒഡിഷക്കെതിരെയും സമനില വഴങ്ങിയപ്പോഴും നോഹ തന്നെയായിരുന്നു മത്സരത്തിലെ താരം. ഈ സീസണിൽ ഗോവയിൽ നിന്നും ബ്ലാസ്റ്റേഴ്‌സിലേക്ക് ചേക്കേറിയ നോഹ ഡ്യൂറൻഡ് കപ്പിലും ഐഎസ്എല്ലിലുമായി 9 മത്സരങ്ങളിൽ നിന്നും 13 ഗോളുകളിലാണ് പങ്കാളിയായിരിക്കുന്നത്.