മക്‌ടോമിനയുടെ ഇരട്ട ഗോളിൽ സ്പെയിനിനെ കീഴടക്കി സ്കോട്ട്ലൻഡ് : ക്രൊയേഷ്യക്കും ജയം : ജർമനിയെ പരാജയപ്പെടുത്തി ബെൽജിയം
യൂറോ 2024 യോഗ്യതാ മത്സരത്തിൽ സ്പെയിനിനെതിരെ അട്ടിമറി ജയവുമായി സ്കോട്ട്ലൻഡ്. എതിരില്ലാത്ത രണ്ടു ഗോളിന്റെ ജയമാണ് സ്കോട്ലൻഡ് സ്പെയിനെതിരെ നേടിയത്.സ്‌കോട്ട് മക്‌ടോമിനയ് ആണ് സ്കോട്ട്ലൻഡിനായി രണ്ടു ഗോളുകളും നേടിയത്.(7′, 51′) മിനിറ്റുകളിൽ ആയിരുന്നു മക്‌ടോമിനയുടെ ഗോളുകൾ പിറന്നത് .
1984 ന് ശേഷം ഐബീരിയൻ എതിരാളികൾക്കെതിരെ സ്കോട്ട്ലൻഡിന് ലഭിച്ച ആദ്യ വിജയം കൂടിയായിരുന്നു ഇത്. ഇതോടെ രണ്ട് കളികളിൽ നിന്ന് ആറ് പോയിന്റുമായി സ്കോട്ട്ലൻഡ് ഗ്രൂപ്പ് എയിൽ ഒന്നാമതെത്തി, രണ്ടാം സ്ഥാനത്തുള്ള സ്പെയിനിന് മൂന്ന് പോയിന്റാണുള്ളത്.2014 ൽ സ്ലൊവാക്യയിൽ തോറ്റതിന് ശേഷം ഒരു യൂറോ യോഗ്യതാ മത്സരത്തിൽ സ്‌പെയിനിന്റെ ആദ്യ തോൽവിയാണിത്, അതിനുശേഷം കളിച്ച 19 മത്സരങ്ങളിൽ 17ലും അവർ വിജയിച്ചു.
ശനിയാഴ്ച സൈപ്രസിനെതിരെ 3-0 ന് വിജയിച്ച മത്സരത്തിൽ മക്‌ടോമിനയ് സ്കോട്ട്ലാന്റിനായി രണ്ടു തവണ സ്കോർ ചെയ്തിരുന്നു.മലാഗയിൽ നോർവേയെ 3-0 ന് തോൽപ്പിച്ച ടീമിൽ നിന്ന് പുതിയ സ്പെയിൻ കോച്ച് ലൂയിസ് ഡി ലാ ഫ്യൂണ്ടെ എട്ട് മാറ്റങ്ങൾ വരുത്തിയാണ് ഇന്നലെ ഇറങ്ങിയത്.
മറ്റൊരു മത്സരത്തിൽ മിഡ്ഫീൽഡർ മാറ്റിയോ കൊവാസിച്ചിന്റെ ഇരട്ടഗോളിൽ ക്രൊയേഷ്യ തുർക്കിയോട് 2-0ന് ജയിച്ചു.യൂറോ 2008 സെമിഫൈനലിലെത്തിയ തുർക്കി, യൂറോ 2020 ലെ മൂന്ന് മത്സരങ്ങളും തോൽക്കുകയും ഒരു ഗോൾ നേടുകയും ചെയ്ത നിരാശാജനകമായ പ്രകടനത്തിന് ശേഷം വീണ്ടും യോഗ്യത നേടാനുള്ള ശ്രമത്തിലാണ്.
പന്ത് ക്ലിയർ ചെയ്യാനുള്ള പ്രതിരോധത്തിന്റെ ശ്രമം പരാജയപ്പെട്ടതിനെത്തുടർന്ന് 20-ാം മിനിറ്റിൽ ക്ലോസ് റേഞ്ചിൽ നിന്ന് കൊവാസിച് തുർക്കി ഗോൾകീപ്പർ മെർട്ട് ഗുനോക്കിനെ മറികടന്ന് ആദ്യ ഗോൾ നേടി.കോവാസിച്ച് ഹാഫ് ടൈമിന് തൊട്ടുമുമ്പ് വീണ്ടും സ്കോർ ചെയ്തു.തുടക്കത്തിൽ തന്നെ മികച്ച അവസരങ്ങൾ സൃഷ്ടിച്ചെങ്കിലും, ചില അസാധാരണ സേവുകൾ നടത്തിയ ഡൊമിനിക് ലിവാകോവിച്ച് തുർക്കിയെ ഗോളടിക്കുന്നതിൽ തടഞ്ഞു നിർത്തി.തുർക്കി ക്യാപ്റ്റൻ ഹകൻ കാൽഹനോഗ്ലുവിന് 36-ാം മിനിറ്റിൽ പരുക്ക് മൂലം പുറത്ത് പോവേണ്ടി വരികയും ചെയ്തു.
നടന്ന സൗഹൃദ മത്സരത്തിൽ ബെൽജിയം ജർമ്മനിയെ 3-2ന് പരാജയപ്പെടുത്തി, കഴിഞ്ഞ നാല് ദിവസത്തിനുള്ളിൽ രണ്ട് മത്സരങ്ങളിൽ നിന്ന് രണ്ട് വിജയങ്ങൾ നേടാൻ ബെൽജിയത്തിന് സാധിച്ചു.1954 ന് ശേഷം ആദ്യമായാണ് ബെൽജിയം ജർമനിയെ കീഴടക്കുന്നത്.ഡിസംബറിലെ തങ്ങളുടെ ഷോക്ക് ഗ്രൂപ്പ് സ്റ്റേജ് ലോകകപ്പ് എക്‌സിറ്റുകളിൽ നിന്ന് തിരിച്ചുവരാൻ ഇരു ടീമുകളും കഠിന ശ്രമം നടത്തിയപ്പോൾ ആദ്യ പകുതിയിൽ ജർമ്മനിയെ ബെൽജിയം പൂർണ്ണമായും മറികടന്നു.
കൊളോണിലെ റൈൻ എനർജി സ്‌റ്റേഡിയനിൽ ആറാം മിനിറ്റിൽ തന്നെ യാനിക് കരാസ്‌കോ നേടിയ ഗോളിൽ ബെൽജിയം ലീഡ് നേടി. 9 ആം മിനുട്ടിൽ ലുകാകു ബെൽജിയത്തിന്റെ രണ്ടാം ഗോൾ നേടി.ഖത്തറിൽ നടന്ന ലോകകപ്പിൽ നിന്ന് പുറത്തായതിന് ശേഷമുള്ള ആദ്യ അന്താരാഷ്ട്ര മത്സരത്തിൽ പെറുവിനെ 2-0ന് തോൽപ്പിച്ച ജർമ്മനി 44 ആം മിനുട്ടിൽ നിക്ലാസ് ഫുൾക്രഗിലൂടെ ഒരു ഗോൾ തിരിച്ചടിച്ചു. എന്നാൽ 78 ആം മിനുട്ടിൽ ഡി ബ്രൂയ്ൻ മൂന്നമത്തെ ഗോൾ നേടി ജർമനിയുടെ തിരിച്ചുവരവിനെ തടഞ്ഞു.സെർജി ഗ്നാബ്രി 88-ാം മിനിറ്റിൽ സ്കോർ 2 -3 ആയി കുറച്ചു.
