ടോപ് സ്കോററായി 2023 അവസാനിപ്പിച്ച് ക്രിസ്റ്റ്യാനോ റൊണാൾഡോ |  Cristiano Ronaldo

ശനിയാഴ്ച സൗദി പ്രോ ലീഗിൽ അൽ-താവൂനെതിരെ അൽ നാസർ ഒന്നിനെതിരെ നാല് ഗോളുകളുടെ വിജയം നേടിയപ്പോൾ സൂപ്പർ താരം ക്രിസ്റ്റ്യാനോ റൊണാൾഡോ 2023 ലെ തന്റെ 54-ാമത്തെയും അവസാനത്തെയും ഗോൾ നേടി.മാർസെലോ ബ്രോസോവിച്ച്, അയ്‌മെറിക് ലാപോർട്ടെ, ഒട്ടാവിയോ എന്നിവരാണ് അൽ നാസറിന്റെ മറ്റു ഗോളുകൾ നേടിയത്.

92-ാം മിനിറ്റിലാണ് 38 കാരൻ മത്സരത്തിന്റെ തന്റെ ഗോൾ നേടിയത്.അൽ നാസറിന് വേണ്ടി റൊണാൾഡോ തന്റെ 50-ാം മത്സരത്തിനാണ് ഇന്നലെ കളിക്കാൻ ഇറങ്ങിയത്.ജനുവരിയിൽ അരങ്ങേറ്റം കുറിച്ചതിന് ശേഷം അൽ നാസറിനായി 50 മത്സരങ്ങളിൽ നിന്ന് 44 ഗോളുകൾ അദ്ദേഹം നേടിയിട്ടുണ്ട്.2023 ൽ പോർച്ചുഗലിനായി ഒമ്പത് അന്താരാഷ്ട്ര മത്സരങ്ങളിൽ നിന്ന് 10 ഗോളുകളും റൊണാൾഡോ നേടിയിട്ടുണ്ട്, അതായത് കലണ്ടർ വർഷത്തിലെ അദ്ദേഹത്തിന്റെ മൊത്തത്തിലുള്ള നേട്ടം 59 മത്സരങ്ങളിൽ നിന്ന് 54 ഗോളുകളാണ്.

19 മത്സരങ്ങളിൽ നിന്ന് ഇതിനകം 20 ഗോളുകൾ നേടിയ 38 കാരനായ സൗദി പ്രോ ലീഗ് ഗോൾഡൻ ബൂട്ട് റേസിലും മുന്നിലാണ്. ഒമ്പത് അസിസ്റ്റുകളും അദ്ദേഹം നൽകിയിട്ടുണ്ട്. അൽ-നാസർ നിലവിൽ ലീഗിൽ രണ്ടാം സ്ഥാനത്താണ്, ലീഡർമാരായ അൽ-ഹിലാലിനേക്കാൾ ഏഴ് പോയിന്റ് പിന്നിലാണ്.ലയണൽ മെസ്സിക്ക് 44 മത്സരങ്ങളിൽ നിന്ന് 28 തവണ മാത്രമാണ് സ്കോർ ചെയ്യാൻ കഴിഞ്ഞത്. ആ 28 ഗോളുകളിൽ 11ഉം MLS ടീമായ ഇന്റർ മിയാമിക്ക് വേണ്ടിയായിരുന്നു.2023-ൽ ലോക ഫുട്‌ബോളിലെ മറ്റ് മൂന്ന് കളിക്കാർ മാത്രമാണ് 50-ഓ അതിലധികമോ ഗോളുകൾ നേടിയത്.ഹാരി കെയ്‌നും കൈലിയൻ എംബാപ്പെയും 52 ഗോളുകൾ വീതം നേടിയപ്പോൾ എർലിംഗ് ഹാലൻഡ് 50 ഗോളുകൾ നേടി.

2023-ൽ ലോക ഫുട്ബോളിൽ ഏറ്റവും കൂടുതൽ ഗോളുകൾ നേടിയ താരം:
റൊണാൾഡോ: 54 ഗോളുകൾ (അൽ നാസറിന് 44, പോർച്ചുഗലിന് 10)
ഹാരി കെയ്ൻ: 52 ഗോളുകൾ (ബയേണിന് 25, സ്പർസിന് 18, ഇംഗ്ലണ്ടിന് 9)
കൈലിയൻ എംബാപ്പെ: 52 ഗോളുകൾ (പിഎസ്ജിക്ക് 42, ഫ്രാൻസിന് 10)
എർലിംഗ് ഹാലൻഡ്: 50 ഗോളുകൾ (മാൻ സിറ്റിക്ക് 44, നോർവേക്ക് 6)